第7級聯賽隊伍聯絡曼城　商借夏蘭特28日

足球博彩神器，每日重心提供盡在《彩報》：http://win.on.cc/football/　

挪威未能打入世盃決賽周，曼城鋒霸艾寧夏蘭特呢段時間冇比賽，只能齋操，來自英格蘭第7級聯賽嘅艾殊頓聯諗到條絕橋，就係商借夏蘭特28日，等佢喺世盃期間繼續比賽，繼續入波。

夏蘭特今季狀態大勇，為曼城上陣18場入23球，其中英超13場入18球，可惜嘅係佢所屬嘅挪威未能打入世盃決賽周，呢段時間被逼休戰，放個長假休息，極其量只能跟隨挪威踢熱身賽。

來自同地區嘅艾殊頓聯忽發奇想，就係提出借用夏蘭特，並已採取行動，該隊官網發出公告：「會方將向曼城提供一份為期28日嘅短暫借用申請，令世盃期間夏蘭特保持比賽，我哋已經聯絡曼城，不過對方暫時未有回覆，呢個並非惡作劇，我哋密切期待。」

艾殊頓聯主帥克萊格指出：「呢個安排好合理，好過佢去打6個星期高爾夫球，我覺得夏蘭特非常適合我哋球隊嘅踢法，佢會好快融入。」不過艾殊頓聯主場只可容納4500人，如果夏蘭特降臨，首先要做嘅係增加容量。