唔少人申請信用卡，好多時係因為有好吸引嘅迎新禮品，好似呢期就有按摩槍、行李喼、空氣清新機，同埋大熱嘅Switch遊戲機等等。不過要拎迎新禮品，好多時都要求喺3個月內簽滿幾千至萬幾不等嘅合資格簽帳額，如果唔想簽卡花費，有無辦法可以唔消費都儲到？
答案係有，想零成本簽帳拎迎新禮物，關鍵就喺張八達通度！如果張新卡迎新簽帳係計埋八達通自動增值嘅話，咁呢招就行得通喇！以早排因為缺貨同「動物森友會」流行而一機難求嘅Switch遊戲機為例，安信Wewa銀聯卡最新做緊迎新，申請新卡3個月內簽滿$14,000就「免費」送部Switch Lite俾你，價值$1,490，除開即係每個月接近$5,000簽帳，話多唔算好多，但平日唔多用信用卡的話，其實都有啲難度，以下就教你點樣零成本拎迎新！
Step 1：申請新卡，同時申請埋八達通自動增值功能，建議每次$500，可以快啲達標。
Step 2：準備一張可以自動增值嘅八達通卡，一部有NFC功能嘅Andriod機，如果用iPhone就要更新做iOS13.3。
Step 3：下載O!ePay App，之後每日由八達通過$500到O!ePay電子錢包戶口，由於張八達通唔夠錢，就會從信用卡自動增值$500。
▲想零成本簽帳拎迎新禮物，關鍵就喺張八達通度！（圖片：八達通官網）
Step 4：因為每日只能自動增值一次，所以每日重覆上述步驟，睇吓你迎新需要幾多簽帳額，儲夠就停。O!ePay戶口上限係$10,000，如果未簽夠，要跟下一個Step先轉走啲錢。
Step 5：用O!ePay轉啲錢去返銀行或FPS戶口，留意每個月轉帳至銀行嘅錢如果多過$3,000，超出嘅金額就要收1%手續費。
Step 6：如果張卡完全唔用，目標係每月轉大概$5,000蚊，咁額外𠴱兩千，可以試吓用O!ePay繳費用咗佢。如果真係用唔到，咁轉多$5,000都只係收$50手續費，$50蚊換部Switch Lite都抵。
如果拎完迎新禮品，之後仲可以靠呢招賺里數或回贈，以$6/里嘅渣打亞洲萬里通萬事達卡為例，每月玩夠$3,000可賺500里數，一個月玩夠$10,000，變相俾$70換多1,166里，咁樣持續一年可以換到日本機票。如果用安信有2%現金回贈嘅Earnmore信用卡計，玩$3,000可賺$60回贈，一個月玩盡$10,000，可賺$200，再扣$70手續費，即淨賺$130。
撰文：唐婉琦
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/